2Ti 2 | KMG | STEP | Kristo Jesuzi aki anonoc tahacguwec i go motec-nanezi bajuhuc qabocge qame huzejec

2 Timothy 2

Wofuŋte momori gie bazo

1 Kristo Jesuzi aki anonoc tahacguwec i go motec-nanezi bajuhuc qabocge qame huzejec 2 Ŋic bocjahazi hone manac ehapie gie gaza gowatuc epo, gie i hâcne ŋic tucne Wofuŋte hatao jueŋgopieŋ â miti munusuŋkeniŋte tâpiri fojarekac iŋucne jaŋe qazu-jaretec banšepieŋ wâc 3 Go Kristo Jesure momori ŋic sanaŋne juhuc irec šârâ hâriŋ kâdocge rocmurâ mi takicguzejec. 4 Moc e momori gie baocmuzi wemocko sahackopec gie fuŋne fuŋne ameckeocmu. E momori jaŋere birio râeweczi wiac honeme sâckeocmu i sawa eocte muocmu. 5 Moc e sisiric gie bahuc sâcmutâc qâsuaocmuzi furine mi roocmu. 6 Moc e he sarac ehuc šâic-ticne manaocmuzi nânâ fârine micne barâ bâsurâ nâme sâckeocmu. 7 Dâŋ gazakopac i manatâc qâtâc ezemec. Wofuŋ eki maŋge bâwiŋkeme mana tara-fârezemec.

Mi docke pârâc ezo

8 Go Jesu Kristore mamanac juzemec” e Dawidire ɋâriczi hâmockonec ɋârerâ faharewec” Biŋebiaŋ-ticne iŋuc hâcne muekopac. 9 Biŋebiaŋ irec erâ šâic fâro manaekopac, erâ wâc sâqocne bapa iŋucne niŋgiŋnumbiŋ ŋekopac Anuture dâŋ ine mi niŋgiŋkekicne. 10 No šâic gie sasawa i Anutu bâwosâefâc-ticne jaŋere erâ ŋetâcneekopac, jaŋe Kristo Jesure bâbâpiaŋzi ŋihe umbiŋ ejareha eri tatamac fofone mâmâc rauckeniŋte iŋuc eekopac hâcne 11 Dâŋ šiŋuc fokac i jâmbomac:

Ere hâmocko šuhuckembeŋko
juju-ticnao iŋuc jaha šuhuckenaŋmu,
12 šâic mana takirenaŋmuo
ehec guriŋ bapa gie wâc banaŋmu.
E mic banaŋmuo
eki iŋuc jaha mic bacnâpoocmu.
13 Mumupaŋ-nâŋeczi dockeocmuo
ere mumupaŋzi sanaŋkeocmu.
Moc murâ moc mu i erao mi fokac.

Mitire mumusifuc

14 Go dâŋ i heɋâre-jarerâ Anuture maio mujomirehuc jaza sanaŋketec dâŋ racnere mu iigoc mi enšepieŋ. I wiac fârimâc, iŋuc ehuc miti mamana sipiric-jopaniŋmu. 15 Anutuzi mana-gareme sâckeocte šoɋachec juhuc giege bazemec, ehuc dâŋ fâri qizecne fâretiŋ jaha mujaŋgeŋkehuc jutec mimizi gieŋic gore faio mi fezejec. 16 Á dâŋ jawanere ojowane bapie mi bafic-jopazemec. Iŋuc eeŋgopieŋzi eraku miti beheniŋmu. 17 Burecdâŋ-jeŋiczi biac wicbâroŋ iŋucne erâ ŋedâmâreocmu. Ŋic iŋucne jaŋeraonec moc Himenaio â moc Fileto. 18 Jahe dâŋ fâri beherâ mukopirec, fafahare i biac fuawec. Iŋuc muhuc ŋic gâcne miti ba imac ejarekopirec.

Anuture qânâ wâtuŋ â râqâc furi sâko

19 Anutuzi qânâ wâtuŋ râeme huwec ine qiŋ herâ domakac. Maqâreŋ-ticne šiŋuc fokac: Wofuŋzi biŋefâc-ticne šâŋitac-jopaekac Erâ moc šiŋuc “Wofuŋte šâŋe bajuŋgopieŋ jaŋe šeŋgoma bâbâsifuc râpeckenšepieŋ.” 20 Ufuŋ sâkoo râqâc wiac goì â siliwazi bakicne i sawa mâcne, jâczi â mâreŋzi bakicne i mâmâc ŋekac. Râqâc gâcnao wiac furi sâkozi huocmu. gâcnao wiac omanezi huocmu. 21 Moc e bâbâsifuc wiac qikiŋneme maŋne ɋaɋackeme râqâc furi sâko eme ufuŋ runezi jambuŋkerâ bajuhuc izi gie biaŋ fuŋne fuŋne baocmu.

Wofuŋte ŋic juzo

22 Socɋârizi wiac fuŋne fuŋnere andac eeŋgopieŋ i bâec bazemec. Ehuc maŋjeŋic biaŋkekicnezi Wofuŋ mu wâwâsic ecneeŋgopieŋ jaŋe bafic-jopatec tiŋke biaŋ eere â mamanasiŋte â maŋjauŋte â wamare henširiŋnenšepieŋ. 23 Mugufuc dâŋ mutucne â racne igockezemec, irec fârine mu qaqatarac sawa fuaekac i manakic. 24 Wofuŋte kiŋaŋŋiczi mu hehefaric mi ezejec, e ŋic sasawa âgo ejarehuc miti micafec qazu-jarezejec, â pepecne ecnepie wiac aaricko mi ejarezejec” 25 erâ ŋic maŋrâŋgeŋ ine urucko mu bâtiŋ ejareme Anutu e jahac moc bawahac-jopame maŋjeŋic bârisierâ dâŋfâri šâŋitanšepieŋ. 26 Eme maŋjeŋic uŋtome, Sataŋte dâŋ reŋkeniŋte wiwitic-ticnao kicjopawec i hetaranšepieŋ.